الفنانة الاولي في السودان

مختتفات من حيات الراحلة عائشة الفلاتية
(ام كلثوم السودان )ذات الصوت المغرد الذي
لم يأتي بعده صوت نسائي بمثل رنينه وذهبيته

تعجز الكلمات أن تعكس لمسة وفاء لصاحبة الإبداع الفريد ومسيرة العطاء المنهمر الذي لم ينقطع ابداً ،،، ساهمت بجهد فريد وصبراً كبير لازم فترة الإستعمار حتي نال سوداننا الحبيب إستقلاله ،،في غير ملل أو كلل فهذا هو ما دفعني اليوم لكتابة سيرتها العطرة لرد جزءً من الجميل في تعبير لمسة وفاء للسيدة الراحلة : عائشة موسي احمد وفاءً وعرفانا بالجميل لهذه الكوكبة النادرة التي واصلت مسيرة عطائها بصبر وإقتدار رغم صعوبة الظروف وعسرات الحياة حتي رحلت من هذه الدنيا وتركت عطائها الوطني جاثم في جنبات صدورنا وقلوبنا يشع نوراًً
فالنقف اخوتي لحظات في لمسة وفاء لنحَي غيثارة الفن السوداني التي تركت عطائها روحاًً ونبضاً وإمتداداً للعطاء الوطني في السودان نسأل الله لها الرحمة والمغفرة

فخر و منبع ورمز الغناء الوطني السوداني الفنانة القامة عائشة موسي احمد المشهورة بــ ( عائشة الفلاتية ) عليها رحمة الله
حقا تعتبر الفنانة الأولي في السودان اشتهرت بالفلاتية إلا انها هوساوية ابا واماً عن جد .
ولدة في مدينة امدرمان عام 1922م وكانت عائشة مولعة منذ الصغر بالغناء وقد استلهمت من الغناء الخفيف المصادر الاولي لفنها الذي كان يعرف بالتمتم فحفظت عدة أغنيات تجلت وأبدعت في أدائها فإشتهرت عائشة في مجال الغناء وإزدادت لمعاناً مع مرور الايام فقد كانت ذات طابع واسلوب معين وطريقة مستحبة في الأداء والتنغيم والتعبير ايضا بالرغم من أنها كانت تكرر دائما بأنها لم تفكر في يوم من الايام الانشغال بالفن فقد كانت تغني بعد أن ظهرت موهبتها في بساطة وتفيض حيوية وعذوبة واسلوب بسيط وصوت رنان جذب حوله الكثير من المعجبين ولهذا فقد جرفها تيار الفن إلي دنيا الشهرة والإحتراف لتجد مكانها الطبيعي في دنيا الغناء والطرب حيث بدء اسمها يلمع وصوتها ينتشر بسرعة وكانت في ذلك الوقت حريصة علي أن تغني للأهل والأصدقاء في المناسبات الخاصة فكان من الطبيعي أن تحوز علي إعجاب كل من استمع إليها .
كان حلمها عن تغني في الإذاعة وإذا بحلمها يتحقق فقد سمع عنها الأستاذ حسين طه زكي مراقب الإذاعة في ذلك الوقت فوافق علي تقديمها للمستمعين ليستمعوا بهذا الصوت وهكذا غنت عائشة لأول مرة في الإذاعة أغنية البلال تزورني مره .
وبعد النجاح الهائل والرسائل التي إنهالت علي الإذاعة من المستمعين أطمانت عائشة لمستقبلها الفني كفنانة وزادت معنوياتها وشقت طريقها بثقة وكانت مسرورة جداً عندما تقاضت مبلغ خمسة جنيهات كأجر لها من الإذاعة ففرحت وأقامت حفلا ابتهاجاً بهذه المناسبة .
أستمرت في الغناء وقفزت للقمة عندما غنت للجنود البواسل بالميدان تسأل الله أن يعيدها منتصرين وهكذا لاقت أغنية (يجوا عائدين )نجاحاً منقطع النظير ولا تزال هذه الاغنية تحتل مكانة كبيرة في نفوس الشعب السوداني .
وبعد ذلك واصلت نشاطها وإذدادت محبة وإعجاب لدي المستمعين وخاصة عندما غنت الأغاني القديمة التي تتجلي فيها الروح السودانية الأصيلة وكان من الطبيعي أن يهتم بها الشعراء والملحنون .
وهكذا غنت للشاعر : عبد الرحمن الريح والشاعر محمود وعبد المنعم عبدالحي ولفت صوت عائشة المطرب احمد عبد الرازق حيث احس في صوت عائشة تعبيرات مؤثرة أوحت إليه بإمكانية أستغلال هذا الصوت في عمل فني مشترك وهكذا تعاون معها في وضع لحنين لأغنيتين شاركا فيهما بالأداء وكانتا بلا شك من الأعمال الجيدة التي لفتت أنظار المعجبين إليهما كانت الأغنية الأولي (الريدة ) والثانية ( ياجافي حرام ) .
وهكذا تألق نجم الفنانة عائشة وأبتسمت لها الحياة وتغلغل فنها في نفوس المستمعين .
وفي مجال المناسبات الموسمية كانت لا تمر مناسبة تحتفل بها الدولة إلا وكانت في مقدمة المشاركين وفي مناسبات رسمية كثيرة كانت ضمن البعثات .
وقد شاركت في احتفال نيجيريا بعيدها القومي حيث وجهت لها دعوة شخصية عن طريق وزارة الإعلام نظرا للمكانة الكبيرة التي تحتلها في نفوس الشعب النيجيري حيث غنت بلغة الهوسا اللغة الام في نيجيريا علي طريقة الالحان السودانية فلاقت إستحساناً كبيراً .
ولعائشة الآن مايقارب ستين أغنية كما لها بعض التسجيلات في إذاعة امدرمان ولندن والكويت والسعودية وأثيوبيا والصومال وقد سجل بريد المستمعين رقما قياسيا لأغانيها الناجحه ومن اشهرها ( العودة ـــ سافر ... حبيب الروح ـ البرتقال ـ الممنوع وصاله ...الخ )
ولم يقتصر نشاطها في الأغنية العاطفية والوطنية فغنت للعيد ورمضان وأنشدت الأغاني الدينية ولم تترك مناسبة وطنية غلا وشاركت فيها بحماس ومن بينها نشيد بلادي وشعب السودان يا بطل وأغنية بلادي حلوة .
عائشة تربعت علي جدارة عرش الغناء في السودان طيلة ما يقارب ثلاثين عام وتركت وراءها ثروة فنية للشعب السوداني لا يستهان بها مما يؤكد أصالتها الفنية وإخلاصها لفنها ووطنها .
`من إرشيف الزكريات
 حوار مع الفنانة الراحلة عائشة الفلاتية.. عمره أكثر من ربع قرن ! ... عائشة الفلاتية.. سيدة ظلت الى آخر رمق من حياتها تحتفظ في حرص بالغ على بعض معالم الربيع ...
سودانية تتمرد على تقاليد الحجاب وتقتحم الحياة العامة في شجاعة وجرأة قبل أكثر من ربع قرن من الزمان لتصبح أول مطربة مبدعة تردد الآفاق شهرتها وذلك في مجتمع متخلف.. ثم تنجح نجاحاً منقطع النظير رغم منافسة أساطين الفن من الرجال الذين عاصرتهم.. عائشة الفلاتية.. سيدة ظلت الى آخر رمق من حياتها تحتفظ في حرص بالغ على بعض معالم الربيع في قسمات وجهها الوضيئة.. وهي بعد خفيفة الدم.. حلوة الحديث.. رقيقة الأحاسيس.. لا تغيب الابتسامة الودودة من شفتيها الا لماماً .. ولا تتعثر في اطلاق الدعابة الطلية المرحة في سرعة بديهة حاضرة دائماً..
قلت لها وأنا أتأمل الـ «تي» الأخضر الموسوم على خدها:
* ايه اللي رماك في حكاية الفن دي.. ياعائشة؟
* واسرعت تقول بصوت تشوبه رنة أسف: تقول شنو؟!
وصمتت وكأنها أرادت أن تتجنب الحديث في هذا الصدد.. فمضيت أقول: ما هو لابد أن تكون في عوامل وظروف دفعتك في الطريق ده.. وانتي أساساً عندك المؤهلات والموهبة اللي بتجعل منك مطربة؟.. وسرحت عائشة بنظراتها بعيداً من خلال النافذة.. ثم قالت فجأة: أصله يا سيدي.. لما كان عمري زي سبعة سنين وكده كنت بندمج مع البنات في بيوت الأعراس واللعبات.. وعشان صوتي
 كان جميل كنت معتزه بيهو جداً.. كنت دائماً بسيطر على الموقف واقوم بالهلولة كلها..
* وكنتو بتغنو شنو؟
السيرة والدلوكة.. غنا النسوان الكبار.. ما ياهو.. أغاني ومرات غنا سرور وكرومه.. واوعى بالك.. في بيوت الأعراس ما بقعد في السباته عشان أرقص.. كنت مهتمة بس بأني اسمع واسرق الغنا..
* وبعدين؟
* بعدين شنو؟!
 ما اهلي زوجوني وانا صغيرة.. عمري 11 سنة.. واقول ليك الحق
 .. الحياة الزوجية ما عجبتني كله كله.. لاني بحب امرق اروح الأفراح..
 والزوج ما بدور زوجته تمرق من البيت من الزمن داك.. قول الراجل زهج وطلقني!
* جننتيهو يعني؟
* واطلقت عائشة ضحكة مزغردة ومضت تقول: بعدين يا سيدي.. قعدت فوق البيت.. مع أهلي يعني.
* طيب .. برضه ما عرفنا.. الفن ده .. دخل في حياتك كيف؟
* اصلو ياود امي.. في واحد راجل صعيدي مولد هنا اسمه محمد زقالي بيعرفونا.. يقوم يجي من مصر واحد خواجه اسمه ميشيان .. ميشيان بتاع الاسطوانات.. ميشيان ده كان جاي يسوق غنايين يسجل ليهم اسطوانات في مصر.. طلب من زقالي يفتش ليهو عن واحدة بتعرف تغني.. قامو جوني فوق البيت وطلبو مني أغني.. وغنيت ليهم غنا الزمن داك البعرفو.. الخواجة انبسط جداً وكنت بتمنى يقول لي قومي تسافري معانا كنت عاوزة ابقى مشهورة..
قول ياسيدي.. الخواجة قال البنت صوتها جميل جداً وتقوم معانا.. أبويا حلف بي جدودو انه ما ممكن.. قال ياجماعة مصر دي انا ماشفتها.. كيف بتي الصغيرة دي تمشيها؟.. وبكيت وزعلت.. والخواجه قعد يترجى أبوي وقال انه مسئول عن أي حاجة تحصل لي.. وما أطول عليك ياود أمي.. في النهاية الخواجة عمل معانا كنتراتو بعشرين غنوة بي ستين جنيه..
مش معقول؟
ما الجنيه الزمن داك كان جنيه.. والدنيا مازي حسه..!
الكلام ده كان زي سنة كم؟
سنة 1936م.. قول يازول سافرت مصر.. وسقت معاي الشيال بتاعي «أبوحراز» والخواجه في مصر سكنت معاهو في بيته مع زوجته واخته ووليداتو..
وسجلتي شنو؟
أغاني كثيرة ما بتذكرها كلها.. لاكين أول غنوة سجلتها اسطوانة يا حنوني عليك بزيد في جنوني ومن زمن بنادي لاكين لطشا عبدالعزيز داؤود وحسع قاعد يغنيها !! وكانت أغانيا ناجحة جداً.. وكان الزمن داك الفوتوغرافات راقدة.. واللي ماعنده فوتوغراف اشترى ليهو واحد عشان يسمع عائشة الفلاتية وكان بيوزع الاسطوانات «البازار السوداني» الخواجه كاتيفانيدس وولده ديمتري ومحلهم في المحطة الوسطى.. ولما كنت في مصر كان بيزوروني ناس عظيمين جداً.. الاستاذ بشير عبدالرحمن وهو سوداني بيشتغل في وزارة الزراعة في مصر.. والف لي غنوه بتقول «البنيه ست العربية».
* ومنو مؤلفين أغنياتك التانيه؟
* أغلبهم عبدالرحمن الريح..
* وكنتي مرتاحة في مصر؟
* الزمن داك لبس التوب ما كان عند المصريين.. فكانوا الاولاد بيزفوني ويقولوا .. تعالوا شوفو الوليه الله لابسه كفن.. زهجت وغيرت ملابسي..
* طيب .. وبعدين؟
* بعدين جات سنة 1940 وكانت الحرابه العالمية قايمة الوكت داك.. حرب دوليه كبيره خالص .. عندك مصر لما مشيت ليها لقيتا ضلمه.. يعني الواحد في بيته ما يولع نور بالليل الا لمبه بسيطه..
* الله !! انتي رجعتي مصر تاني؟
* الكنترات ما عشرين غنيه.. سجلت منهم شويه وجيت السودان ورجعت تاني مصر عشان اسجل الباقي.. ولو ما سافرت كانو أهلي بيدفعو تعويض.. والزمن داك الناس مع القروش في تلتله.. واوعى بالك السفر لمصر كان بالقطر لغاية حلفا وبعدين بالباخرة لغاية الشلال واسوان.. وتاني بالقطر لحد القاهرة..
وصممت عائشة للحظات وارسلت نظرات ساهمة عبر النافذة ثم تمتمت قائلة:
الفن ده.. يا ما شفنا منه الويل وسهر الليل!..
ثم استرسلت تقول: غايتو لما جيت من مصر الحكومة جندتني للترفيه عن الجنود كنت بغني طوالي كل يوم.. في معسكرات كيلو خمسة.. وكيلو سته.. وخشم القربة.
 \.. وفي معسكرات الامريكان في وادي سيدنا..
 ووصلت لغاية كرن في اثيوبيا لاكين بعد ده.. خفت.. .. تاني ما مشيت لي قدام
قامو قالو لي تقومي طرابلس عشان
 الترفيه عن جنودنا هناك وفي كفرة وطبرق وكدي.. ما قدرت ما عندي مروه لي ده كله.. قلت ليهم انا بنتظر العساكر لما يجو من الميدان ولما يرجعو هنا قبلي.. وبالفعل كنت بغني للجنود العائدين والمسافرين حتى الجرحى في مستشفى النهر الحسه بقي وزارة الصحة.. لاكين لليبيا سافرو ناس أحمد المصطفى وحسن عطيه ومحمد احمد سرور..
* وكنتي بتغني شنو للجنود؟
* كنت بغني الأغاني الوطنية والحماسية والشجاعة..
* زي شنو كده؟
* عندي غنوتين الفتهم براي.. واحدة بتقول «يجو عايدين» والتانية «الليمون سلامته بريه»..
* والليمون تقصدي بيهو شنو؟
* الليمون.. ما نحن لونا أسمر ..
* يعني ليموني.. والا شنو؟
* وزغردت عائشة في ضحكة مرحة من الأعماق ثم استرسلت قائلة: وفيها كوبليه بقول:
جاهل صغير وحمامه
يوم لبسو الكمامه
ودوهو خشم القربة
ياربي عوده سلامه
* ماعندك حاجة تانية عن الحرب؟
* وعقدت عائشة ما بين حاجبيها وقالت في نبرات جادة:
كيفن؟ غنيت أيام غارت الطيارات التليانية على الخرطوم وام درمان.. فيها كوبليهات بقول فوقا............:
خطريه برطانيا دوله قوية
بحري وسما
ياهتلر الألماني وموسليني الطلياني
لو تضرب السوداني تصبح ريال براني
مابسير هنا
طيارة جاتنا تحوم
شايلة القنابل كوم
جات تضرب الخرطوم
ضربت حمار كلتوم ست اللبن
طيارة جات من بدري
شايلة القنابل تجري
المدفع الجبلي
خلى البحر يغلي والجو هنا
* كدي اتذكري .. عندك حاجة تاني؟
* وتطلعت بنظراتها لسقف الغرفة ومضت تقول:
عندي غنوة طويلة نسيتا لاكين فيها كوبليه ظريف بقول:
يا طلعت سيب الكورة
وشوف واجب الدبورة
الانجليزي بي اسطولا
تهجم تعود منصورة
* والاشعار دي تأليف منو؟
* تأليفي أنا براي.. مالو؟! انا ما بألف؟ الكاشف ما قاعد يألف!!
* طيب .. نرجع لمرجوعنا .. أقصد بعد ما انتهت الحرب..
* غايتو.. قول يازول.. الحرب انتهت سنة 1948.
* تقصدي 1945م اياهو .. انا خابراه.. وكانت الاذاعة عملوها سنة 1942م.. ومحلها كان مكتب بوسته امدرمان القديم في ميدان سوق المويه.. وكان مسئول عنها في أم درمان حسين طه زكي وعمك الشاعر صالح عبدالقادر والرئاسة في الخرطوم من مكتب الاتصال العام وكان فوقه متولي عيد وخانجي وحلمي إبراهيم..
وتريثت عائشة لبضع ثوان كأنها كانت تستجمع ذكرياتها ثم اردفت تقول:
يا سيدي.. عمك المرحوم صالح عبدالقادر بعت لي مراسله فوق البيت.. المراسله
 اسمه محمد الحسن. حسه مات الله يرحمه... قال لي عايزنك في الاذاعة بعتني ليك صالح أفندي عبدالقادر..
* وغنيتي طبعا في الاذاعة؟
* طبعاً.. لكن بقيت مشغولة طوالي.. أغني في الاذاعة وعربية الجيش دايما واقفة لي قادم البيت عشان يسوقوني امش اشتغل في الترفيه عن الجنود..
* وبعدين؟
* بعدين الاذاعة نقلوها من البسوتة لبيت الزين حسن في أم درمان اظنه حسه فوقه مدرسة بيت الأمانة..
* الاذاعة خلقت ليك شهرة طبعاً؟
* ابداً.. كنت مشهورة باسطواناتي..
* لكن الاذاعة ضروري تكون اظطرتك تطوري أغانيك.. مش كده؟
* أيوه ده صحي.. غنيت لعبيد عبدالنور.. «احب عيونك وبص هنا» وأغنية وطنية بتقول: «يافتاة النيل انتي قصدك ايه.. انا قصدي الحياة العصرية.. في بلده سودانية.. رقه وادب فونون واحشتام ياحنون» وكتير كتير ما حافظاهو..
* ورحتي مصر تاني؟
* رحت كتير جداً.. خمسة ولا ستة مرات.. والمصريين كانو بيسموني أم كلثوم السودان..
* وقابلتي هناك فنانين مصريين واتعرفتي بيهم؟
* قابلت مرة فريد الاطرش في الاذاعة المصرية وكنت بسجل فيها وتكلمنا عن الفن في مصر والسودان.. ورياض السنباطي قال لي انه مستعد يلحن لي غنوة .. شكرته واعتذرت ليهو بان لهجتي سودانية.. ولاشنو؟!! واطلقت عائشة احدى ضحكاتها المرحة المزغردة..!
* وخلاف مصر سافرتي بلاد بره؟
* سافرت لنيجيريا بمناسبة اعلان استقلالها..
* واتعرفتي بفنانين نيجيريين هناك؟
* اتعرفت بفنان عظيم اسمه شاتا .. ده عبدالوهاب بتاع نيجيريا مطرب الامراء والعظماء..
* وحسه اسرتك وين يا عائشة؟
* أبوي الحاج موسى أحمد .. وامي حسع في القضارف.. لاكين جدي اتوفى.. ومرقد رأسه في الفاشر..
* -الله يرحمه ويغفر ليه- أخيراً عاوز أعرف.. بتشتكي من حاجة؟ اي حاجة في عملك كفنانة؟
* واكتسى وجه عائشة بمسحة حزينة وترددت للحظات ثم اندفعت تقول في حدة منفعلة: كيفن ما بشتكي.. بشتكي يا زول من عدم التقدير.. عشان العمل الكبير خالص الـ قمت بيهو وكل التضحيات اللي ما قصرت فيها.. كافية جداً انه كفايه ما كده وما اشتغل وآخذ معاش او مكافأة .. انا ما قصرت في حق وطني الناس عملوا لاكين انا عملت.. شقيت وتعبت ووهبت عمري كله لوطني..
واطرقت عائشة لتخفي تأثرها ومضت تقول في نبرات مفعمه بالحزن: «انا ما مبسوطة ابدا.. وطني ما كافأني.. لاكين عندي أمل كبير في انصاف المسئولين وتقديرهم .. ولا شنو يا استاذ؟»!!..
ومع ذلك.. فقد اطلقت عائشة ضحكة مزغردة نابعة من طيبتها الفطرية وصفاء نفسها وسجاياها الحميدة... ولكن ضحكتها هذه المرة لم تخل من رنة أسف شفيفه ومرارة طافحة بالشجن!..
الصحفي الراحل رحمي م. سليمان في مصر عندما -
كانوا يشاهدون التوب يقولون شوف الست لابسة كفن
حوار في صحيفة الصحافة الصفحة الألكترونية العدد العدد رقم: 5297
2008-03-18
http://www.alsahafa.info/index.php?type=3&id=2147495700

[img][/img]

mrgayeya allah yaje gen rey

» سلسلة معلومات عن شعب الهوسا ا(لحلقه الاولي)
» تاريخ الهوسا في السودان
» ظاهرة العنف في السودان
» ندوات ثقافيه علي مستوي السودان ـ
» سيره قبيله الهوسا السودان